1Jo 5 | ATA | STEP | Mo 'ei ane anu umuxamuxaxu tanu vaikala lexe Iesu anu Kalisito, la anu Lataua 'olu manina. Ia 'ei ane anu umasaxau Maminge Lataua, la anu umasaxau 'Olu Iesu kalumo.

a 5:11Ioa 4:15

b 5:3Ioa 14:15, 23-24

c 5:6Ioa 1:29-34

d 5:8Ioa 15:26

e 5:9Ioa 5:32-37

f 5:10Ioa 5:36-40

g 5:12Ioa 3:36

h 5:13Ioa 20:31

i 5:14Ioa 14:13-14; 1Ioa 3:21-22

j 5:16Mat 12:31

k 5:181Ioa 3:9

1 John 5

Tamuxamuxaxu Tanenge Noxou Lataua 'Olu

1 ^aMo 'ei ane anu umuxamuxaxu tanu vaikala lexe Iesu anu Kalisito, la anu Lataua 'olu manina. Ia 'ei ane anu umasaxau Maminge Lataua, la anu umasaxau 'Olu Iesu kalumo. 2 Lexe nenge tamulinu lapuloto noxou Lataua xo tamasaxau Lataua, la nenge telavu lexe nenge temasaxai'a Lataua ta 'olu. 3 ^bLexe nenge tamasaxau Lataua, la tamulinu lapuloto noxou. Ia tamulinu, la pekia'u uasi, se'isisisi. 4 Xo nenge temuxaxu tanenge noxou Iesu, la tetaloxolixu xavi sou lia 'o. Xe 'ei ane anu muxali Lataua 'olu, la anu utalotaloxolixu 'ili'ilixo masumasua no lia 'o. 5 Anu ane umuxamuxaxu tanu lexe Iesu anu Lataua 'Olu, la anu utalotaloxolixu 'ili'ilixo masumasua sou no lia 'o.

6 ^cIesu Kalisito anu mulu'e no lia 'o, la Anu mu'ulo no anu lexa xe musoli la sialuxu musiali. Anu mune'e, la u'ulo no lexasi uasi, Anu mu'ulo no anu lexa xe musoli la sialuxu musiali kalumo. Uleenu Tavuna anu ukalavoi uasi, ia Anu kalumo uvivikala lamana lexe Iesu anu Lataua 'Olu. 7 Ia Uleenu Tavunasi uasi, mii tamei kalumo mivikala lamana aloxo ne. 8 ^dAne'i lexa xe sialu. La sou ane'i tatalu ivikalasou Iesu, la vaikalai'a vilesisi. 9 ^eNenge tamulaxu tanenge no anu vaikala noxi'a ta mitema, la manina lexe nenge tamulamulaxu tanenge no anu vaikala manina noxou Latauasi. Ia Anu muvikala lexe Iesu anu Lataua 'Olu. 10 ^f'Ei ane umuxamuxaxu tanu noxou Lataua 'Olu, la utetelisou vaikala lexe Iesu anu Lataua 'Olu no anu maulixu. 'Ei ane umuxaxu tanu noxou Lataua uasi, la anu mu'oxonu Lataua muxali loxo itema sou kalavoi. Xo anu umulaxu tanu no anu vaikala noxou Lataua lexe Iesu anu Lataua 'Olu, uasi. 11 Lataua muvikala lexe ulosinge mauli ane ukalu uasi. Xe mauliu ane ne, muxolu noxou 'Olu Iesu. 12 ^g'Ei ane anu uno'u 'Olu, la anu uno'u mauli. Ia 'ei ane anu uno'u Lataua 'Olu uasi, la anu uno'u mauli uasi.

Vaikala sou Kaluxu

13 ^hIoxe, eni ekaukavunu vaivaikala ane ne ulai noxinge ngingi e ngamuxamuxaxu tangengi noxou Lataua 'Olu, mo sou ngingi ngalavu laixe lexe ngingi ngeno'u mauli ane ukalu uasi. 14 ⁱNenge telavusou Lataua manina lexe mii ma'ia ane nenge talinga no anu masaxa noxou, la Anu ulomunengesi. 15 Lexe nenge telavu lexe Anu ulomunenge, la mii ma'ia ane nenge telingau ne, telavu lexe nenge teno'u mukalu.

16 ^jIoxe, 'ei ane anu mumaisou itema vile noxou Lataua u'oxonu 'ilixo vile masua sou u'oxonu usoli uasi, ia anu ukilakasou, la Lataua ulosou mauli. Eni avivikalasi'a ane'i ane i'oxonu 'ilixo vile masua sou u'oxone'i isoli uasi. Ia 'ilixo vile masua u'oxone'i ta mitema, la isoisoli. Ia eni avikalane'i lexe ikilakasou uasi. 17 'Ili'ilixo masumasua, anu masua no iou Lataua. Ia se'i anu u'oxone'i ta mitema isoisoli uasi.

18 ^kNenge telavu lexe 'ei ane muxali Lataua 'Olu, la umomomo sou usolonu 'ili'ilixo masumasua uasi. Anu usaxila'u, la sou Satani umomomo sou u'oxonu mii vile masua noxou uasi. 19 Mo nenge telavu lexe nenge kalumo Lataua ta 'olu mo telavu lexe Satani usaxila'u lia 'o mukalusi. 20 Mo nenge telavu kalumo lexe Lataua 'Olu mulu'e no lia 'o sou mulosinge lavulavu, la sou nenge talavusou lexe 'ei Anu Lataua manina. La sou nenge texolu noxou Lataua mo noxou 'Olu Iesu Kalisito kalumo. Anu Lataua manina mo Anu mauli ane ukalu uasi.

21 La sou, ta molomoloxeni e amasaxainge, ngalomu. Ngasaxila'inge laixe noxi'a ta maliava sou kalavoi.